الأحد، 30 نوفمبر، 2008

المختصر المفضول فى وصف اسطنبول 2

الجزء الأول خلص على خروجى من المطار ومقابلتى لمندوب الشركه السياحية
كان فى اثنين (واحد وواحده) جايين برضوا من مصر يقضوا شهر العسل وكان مستنيهم نفس المندوب وركبوا معانا الأتوبيس السياحى
الإثنين دول سبحان الله فى صدفه جميله لما رجعنا مصر كنت انا ومروة بنتغدى فى بيسترو وقابلناهم هناك برضوا

المهم ركبنا الأتوبيس واتحركنا ناحيه الفندق
واحنا ماشيين فى الشوارع كنت حاسس زى الفلاح ال مبهور بشوارع المدينه
هى شوارع عاديه وعربيات عاديه بس جو مختلف
مندوب الشركه ال هو المرشد السياحى بدأ يرص شويه معلومات لينا فى طريقه ميكانيكيه صرف حول تركيا والمناخ والعمله والشوارع والنظام ...الخ
طلع فلسطينى من غزة
طبعا كل الكلام ال كان بيقوله كان بالنسبه لى كنز ثمين علشان انا مش عارف اى حاجه فى اى حاجه فكان كل ما يقول معلومه بربع جنيه كنت باكتب وراه
من المعلومات ال قالها وصدمتنى ان الأجازه الأسبوعيه فى تركيا السبت والأحد
ينهار ابيضضضضضضض
يخرب بيت اتاتورك
حتى يوم الجمعه مخلهوش اجازه وبقى يوم عمل
المندوب واحنا رايحين ادانا ورقه فيها الجولات السياحيه ال هما منظمينها واسعارها بمواعيدها
كان ثانى يوم فى رحله لجزر الأميرات وحجزت معاه
نزلنا عند الفندق وكان اسمه euro plaza اتاتورك

الفندق


وكان جنب ميدان تقسيم على بعد محطتين
ميدان ومنطقه تقسيم دى اشهر مكان سياحى فى تركيا
يعتبر شبه ميدان التحرير عندنا مثلا
كله فنادق ومركز مواصلات ومنطقه رئيسيه

انا كنت مخطط انى هاريح شويه وبليل انزل اتمشى استكشف المكان واشترى خط موبايل علشان نطمن اهالينا
طبعا كل دا كان وهم
دخلنا فى غيبوبه نوم وصحينا ثانى يوم
ودا كان ملخص اول يوم فى تركيا
نووووووووووووووووووم

ثانى يوم صحينا بدرى علشان نلحق الفطار فى الفندق قبل ما اتوبيس شركه السياحه يعدى علينا الساعه 9 صباحا علشان نروح جزر الأميرات

جزر الأميرات دى عباره عن مجموعه جزر فى بحر....معرفش اسمه غالبا بحر مرمرة
احدى جزر الأميرات

كانت بتستخدم فى العصر البيزنطى لنفى اى حد من العائله المالكه يعمل مخالفات ومشاكل
وبرضوا فى عصر العثمانيين استخدمت لنفس الغرض
الصراحه هى منفى خطير
ياريت الواحد يتسجن ولا يتنفى هناك
هى جزر عباره عن ايه فى جمال الخضره وطبيعه رائعه سبحان الله



المهم الأتوبيس خدنا ونزلنا عند ميناء بحرى ال هناخد منه المركب ال هتودينا الجزر
فى محطه الميناء استنينا ميعاد المركب لمده ساعه




يومها كان الأحد كان يوم اجازه فكان فيه رحلات كثير للمدارس رايحه والمحطه كان كلها عيال
المرشد السياحى واقف معانا المصريين يشرح لينا وشويه شويه الأطفال بتوع الرحله المدرسيه اتلموا علينا وقعدوا يستظرفوا ويعملوا معانا زى ما بنعمل فى السياح فى مصر
ساعتها واحد معانا علق تعليق لذيذ
قال اول مره اجرب شعور انى ابقى فرجه


المرشد السياحى ندى المدرس بتاعهم وزعقلوا والمدرس لمهم بعيد
ركبنا المركب وكان مركب حكومى مفتوح
الطريق كان تحفه

المياه مع المناظر الطبيعيه مع الجو مع الطيور
كانت تحفه

بعد ساعه وصلنا اكبر واخر جزيره من مجموعه جزر الأميرات
نزلنان من الجزيره
فى الجزيره ممنوع استخدام العربيات فى التنقل
الوسيله الوحيده للتنقل هى الحنطور او العجل


خدنا جوله فى الجزر بالحنطور وركب معانا ساعتها اثنين عرب برضوا جايين شهر عسل
واحد سعودى متزوج واحده اردنيه بس كانوا لذاذ واجتماعيين

الجزيره عباره عن منتجع نضيف وبيوت خشبيه فى اغلبها وجو لذيذ

بعد جوله الحنطور نزلنا وكانت فقره حره
قررنا فى خطوه جريئه وغير مسبوقه انا و مروة اننا نركب عجل
خدنا الأول عجله دبل ال بيركب عليها اثنين بس كانت سواقتها صعبه فرجعناها وكل واحد خد عجله
الف فى الجزيره بالعجل كانت احلى حاجه فى رحله تركيا كلها هى وحاجه كمان هاقولها فى الأخر
كانت متعه جامده

لفينا فى الجزيره ونزلنا فى حتت كثير نتصور
بعد ما خلصنا لف بالعجل نقينا مطعم نتغدى فيه
وكان ميعادنا الساعه 3 علشان نقابل المرشد السياحى ونركب العباره ونرجع
قابلناه وركبنا المركب وعدنا سالمين

فى الرحله دى قررت بعد تحريض من مروة اننا نقفش على شركه السياحه ومنطلعش معاهم اى جولات ثانيه

هما خدوا على الرحله دى 50 دولار على الواحد
وكل ال عملوه انهم ركبونا مركب حكومى ودفعوا ثمن جوله الحنطور وخلاص
حاجه متسواش 10 دولار
فقررنا نقفش عليهم ونتفسح لوحدهم
وكان قرار مفصلى وتاريخى ومحورى فى الرحله
والى الأن مش عارف دا كان قرار صح ولا قرار اندم عليه

رجعنا الفندق ريحنا شويه وبليل نزلنا نتمشى فى شارع الإستقلال
شارع الإستقلال دا شارع مشهور جدا فى اسطنبول
هو شبه عباس العقاد كدا بس الفرق ان ممنوع عربيات تمشى فيه
هو شارع ضيق شويه وطويل خالص وكله مطاعم ومحلات واماكن ترفيه
الشارع جوه لذيذ والتمشيه فيه ممتعه
وفى وسليه مواصلات عباره عن عربيه ترام قديمه اوى

روحنا مطعم توسمنا فيه الخير شكله شرقى
علشان نعرف نطلب كانت طبعا مأساه علشان موضوع اللغه
كان فى كذا نوع لحمه والراجل كان بيعرف انجليزى بسيط
فقالى كذا نوع فسألته على نوع هل دا لحم خنزير
الراجل زعل منى جدا وقالى i am a good muslim
وقالى انا مامتى بتلبس زى مراتك وشاور على الحجاب


الأكل فى تركيا شبه مصر بالضبط
معرفش مين واخد من مين بس اظن اننا واخدين منهم

هناك الكفته والكباب والشاورما هما الأطباق الرئيسيه واسمهم بالتركى كدا
ايضا الحلويات الشرقيه البقلاوه والحاجات دى طلعت اسماء تركيه

خلصنا الجوله فى شارع الإستقلال ورجعنا االفندق
ودى كانت نهايه ثانى يوم فى اسطنبول

هناك تعليقان (2):

  1. ايه الحلاوة دي
    وحشني بجد مع اني بقالي اقل من اسبوع ماشوفتكش

    ترجع من تركيا بالسلامة يا حبيبي :P

    ردحذف
  2. السلام عليكم
    اخي السيد / محمد
    استمتعت كثيرا بتفاصيل رحلتك الى تركيا وازداد شوقي الى الذهاب لها من روايتك .
    انا أحمد مهندس مصري اعمل بالكويت وفرحي بإذن الله في شهر يوليو وبحثت في الانترنت عن شركات سياحية الى تركيا لم اجد .
    ارجو منك ارشادي الى شركة السياحة التي ذهبت من خلالها كما ارجو ان اعرف كم كلفتك الرحلة مع التفاصيل .
    آسف لإزعاجك وارجو زيارتك لمدونتي .

    ردحذف