الجواز قسمة و نصيب !! الجزء الثانى

اتكلمنا فى الجزء السابق عن قرار الزواج و لماذا نتزوج و هنتكلم فى الجزء دا عن أول مرحلة هامة إن لم تكن اهم المراحل على الإطلاق. 

عند الإختيار :

دلوقتى اخذت قرار الزواج و عرفت لماذا تتزوج و عاوز و عاوزه تختاروا الشخص الأنسب ليكم و مهم أوى موضوع الأنسب دا و هنرجع له تانى.

الإختيار هو أهم خطوة على الإطلاق فى الزواج لأنه إذا كان الإختيار صحيح فإن ذلك سيوفر عليك الكثير من المشقة فى حياتك الزوجية فيم بعد و طبعاً الموفق هو الله فلا تنسوا الإستعانه به مع الأخذ بالأسباب إلى أقصى درجة.

هنتكلم فى الاختيار عن

- كيف اختار ؟

إذا كنت شاباً فهناك كذا احتمال :

ممكن انك تكون معجب بواحده شفتها فى اى حته فى الشغل ، فى عمل تطوعى، فى دورة تدريبية ،أو فى اى مكان و عجبك تصرفاتها و شكلها و طريقتها و افكارها ان تيسر لك ان تعرفها ففى الحالة دى خلاص يبقى تتوكل على الله و تعمل الخطوات اللى هنقول عليها كمان شوية.

طب لو انت عاوز تتجوز بس مفيش حد معين قدامك عندك 3 سكك متوازية :

- اول حاجه تدعى ربنا انه يوفقك للاختيار الصح كتير اوى

- ثانى حاجه تقول لكل اللى حواليك انك بتدور على عروسة مواصفاتها واحد اتنين تلاته لو حد يعرف واحده يدلك عليها

- ثالث حاجه دور فى المحيط بتاعك بص حواليك كويس اكيد هتلاقى واحده مناسبه ليك.

و لو انتى بنت ففى برده كذا احتمال :

لو انتى متقدملك حد او كذا حد يبقى هتدخلى على الخطوة اللى بعدها اللى هنتكلم فيها دلوقتى 

لو مش متقدملك حد يبقى هتعملى حاجتين :

- هتدعى كتير ان ربنا ييسرلك زوج صالح

- و هتعرفى اللى حواليكى ممن تثقى فيهم انك مستعده للزواج و تحكى عن المواصفات التى تتمنيها فى زوجك بشكل او بآخر ( ممكن تحكى مع أصحابك من باب الدردشه حتى ايه مواصفات فتى احلامك ) هى حاجه تبدو صعبه بس البنات بتعرف تعملها :) و هى حاجه مش عيب و لا حرام و كمان تحاولى توسعى دايرة علاقاتك قدر الإمكان.

طيب دلوقتى احنا وصلنا لفكرة ان فى عريس معين و عروسة معينة او عرايس و عرسان محددين و عاوزين نتأكد من مدى ملائمتهم لينا:

- موضوع القبول ؟؟

عندما يتقدم لك شخص او يتقدم الشاب لفتاة أول شيىء يجب تحديده هو القبول

و يستحسن أن يتأكد المتقدم من وجود القبول لديه قبل ان يقدم على الذهاب الى البيت و التقدم بشكل رسمى حتى لا يتسبب له ذلك و لاهل البيت فى الإحراج و أيضاً الفتاة إذا استطاعت تحديد موضوع القبول قبل اول لقاء يبقى أفضل كتير.

طب أزاى ؟

فى اى مكان انتى تعرفى او انت تعرف ان الطرف الاخر هيكون موجود فيه حاولوا تتواجدوا فى نفس الوقت لتلقوا نظرة عليه لتحديد القبول الشكلى.

القبول من وجهة نظرى هو عدم النفور و يتدرج ليصل الى حد الإعجاب

فإذا كان فى نفور من الطرف الاخر يبقى خلاص فركش

و اذا كان فى قبول و لو مبدأى يعنى فى استعداد لمد الجسور و محاولة التفاعل يبقى كدا عدينا اول مرحلة...

و فى نقطة مهمة : فى بعض البنات بيستعجلوا بالرفض لمجرد ترييح الدماغ من التفكير او لانهم شايفين ان الشخص الاخر مش مناسب و بدون سبب و بدون حتى ما يبقى فى نفور و لا حاجه بس هو شكله كدا مش مناسب او مش بالمسطرة زى ما هى بتحلم بقتى أحلامها فبلاش و خلاص و يادار مادخلك شر و على فكره الموضوع دا انا شفته كتير اوى فى البنات مش عارفه إذا كان كدا كمان فى الشباب متهيألى انى شفت برده كذا حالة كدا انها لو مش زى ما متخيل بالمسطرة يبقى شكرااااا و لا حتى بيدى نفسه فرصة انه يشوف هل ممكن يكون فى انسجام او لأ و يظل يبحث عمن فى خياله و التى فى الحقيقة لا وجود لها إلا فى الخيااااااااال.

بقوللهم : اوعوا تضيعوا على نفسكم فرصة ان ممكن يكون الشخص دا أنسب حد ليكم بس انتم مادتوش نفسكم الفرصه انكم تعرفوا بعض و تتعرفوا على الطرف الآخر عن قرب أكتر، الجواز دا رحلة عمر مينفعش فيه الاستسهال....

و زى ما بيقولوا ان الجواز كيمياء فلازم نقرب المواد من بعض و نشوف فى امكانية انها تتفاعل و للا لأ ؟لكن منقولش بشكل مسبق و نحكم بسرعة لأ مش هيتفاعلوا بدون ما نجرب.

خلاص فى قبول و عاوز اتقدم او فى قبول و موافقه انه ييجى البيت  أو جه فعلاً مرة البيت و فى قبول مبدأى بيننا ها و بعدين ؟

يعنى طالما مفيش نفور نقدر نعتبر دا قبول كبداية.

- موضوع السن ؟

انا ليا وجهة نظر متواضعة كدا   

و طبعاً دى مش قاعدة دا مجرد وجهة نظر و ممكن يبقى حالات كتير ناجحه لا تخضع لهذه وجهة النظر.

انا شايفه انه أفضل لو السن قريب يعنى خلال فترة زمنية لا تتجاوز ال 7 سنوات عشان ميبقاش فى فجوة أجيال بس بشرط أنه يكون الشاب ناضج بشكل كافى عشان متحسش انها هترتبط بطفل او بعقلية أصغر منها و عشان يبقى عنده القدره انه يحتويها فكريا و روحيا ووجودهم داخل نفس الفترة أى من نفس الجيل بيعطى العلاقة طابع صداقة جميل و فهم أعمق من الطرفين لبعضهم البعض.

- ماذا أفعل قبل اول لقاء ؟؟

اجمع كل ما يمكن جمعه من معلومات عن الطرف الآخر

لأن هذه المعلومات قد تعفى من المقابلة من الأساس إذا كان فى الطرف الآخر مالايمكننى قبوله او لم يكن فيه شيىء ضرورى و أساسى بالنسبه لى.

يجب على اولاً ان احدد المواصفات التى :

1- لا يمكن ان اتنازل عنها.

2- تمثل عيوب أعرفها و أقبل بها.

و يمكننى تحديد هذه الصفات بأن أسال نفسى سؤال و هو

إذا توافر بالطرف الآخر كل المواصفات التى أرغب فيها معادا هذه الصفة أو هذا المعيار هل سأقبل به ؟

- اذا كانت الإجابة بنعم إذن هذه الصفة هى عيب أعرفه و أقبل به و لكن لابد ان اكون اعرفه و بعد ذلك أقبل به، اراه جيداً وأقبل به و لا أغمض عينى عنه و كأنى لم أره ثم أعود لأكتشف بعد ذلك أن به هذا العيب الذى رأيته من زمان و فوته و لم أهتم به.

- و إذا كانت الإجابه بلا إذن هذه صفة أساسية و لا يمكننى التنازل عنها.

يجب التنويه إلى شيىء هام جداً:

إذا كنتم تبحثون عن ملائكة تتزوجونهم فأنصحكم ألا تتعبوا أنفسكم فلا يوجد على الأرض غير البشر ،البشر الذين كما بهم مميزات بهم أيضاً عيوب.

فلابد أن تعرف و تعرفى ان من تتزوجوه سيكون به عيوب و لكن الفرق ان هناك من يقبل عيباً لا يقبل به آخرون ، أى أن عليك أن تعرف اى العيوب تقبل و ايها لا تقبل و ما هى معاييرك فى الأختيار و الصفات التى لن تتنازل عنها و الاخرى التى يمكنك التنازل عنها.

و يجب عليكم ان تعرفوا (بتشديد الراء) لأنفسكم هذه المعايير و الصفات مثلا

لو عاوزاه متدين اى تدين تعنيه ؟؟ ما هو مفهومك عن المتدين ؟؟ كيف يمكنك التأكد من أنه متدين ... عاوزاه كريم ، ما هو مفهومك عن الكرم ؟؟

عاوزها جميلة ، ما هو مفهومك عن الجمال هل جمال الشكل فقط ام جمال الروح ام كلاهما و ما هى معاييرك فى ذلك ؟؟ عاوزها بنت حلال ... ايوا هتعرف ازاى يعنى انها بنت حلال؟؟ وهكذا ،

كل ما كانت معاييرك أوضح لنفسك كل ما كنت أقدر انك تدعبس عنها.

محاولة الوصول لهذه المعلومات قد تكون سهلة او صعبه و لكنها مهمة و يمكنك الحصول عليها بالتدريج (يعنى مش لازم تعرف كل حاجه مرة واحدة) لكن عليكم ان تكونوا شديدى الملاحظة و أهم شيىء التأكد من الصفات الأساسية أولاً التى لا تستطيعوا التنازل عنها أما باقى الصفات فيمكن التعرف عليها بالتدرج بعد ذلك سواء من خلال السؤال عن الطرف الآخر او سؤاله هو مباشرة أو بالموقف أو من الحوار أو بطرق كثيرة سنتكلم فيها لاحقاُ.

لكن حاببه أقول نقطة دلوقتى فى الموضوع دا انكم مش شرط من موقف واحد تقيم الشخص بصفة معينه ، يعنى أيه؟؟

يعنى مثلاً لو حد من الطرفين قام بفعل معين فسره الطرف الآخر على أنه بخل على سبيل المثال.

مينفعش نصدر حكم من موقف واحد انه بخيل لكن بنحط الموقف دا فى الذاكره و نركز فى المواقف التى تليها اذا جاءت مواقف اخرى تنفى هذه الصفة و تثبت الكرم مثلاً يبقى الصفة دى ليست صفة حقيقية و انما كان تفسير الموقف خاطىء او انه كان موقف استثنائى أو أى شيىء أما إذا تكرر هذه المواقف و التى تثبت هذه الصفة مراراً و تكراراً بشكل قوى إذن هى صفة حقيقية و التفسير كان حقيقياً و تخضع بعد ذلك هذه الصفة للتقييم إذا كنت تقبله بها كعيب ستتعامل معه أم انك لا تقبل هذا العيب و لا تستطيع التأقلم معه ؟؟

خلينا نختصر النقطة المهمة اللى عاوزه اركز عليها ان الحصول على المعلومات الأساسية ستفيدك فى اللقاء الأول كثيراً و قد تعفيك منه كما اتفقنا.

فى النهاية هقول بعض القواعد الهامة التى يجب مراعاتها عند الإختيار:

- حتى تاخذوا قرار بالموافقة على الطرف الآخر لا بد ان يكون ذلك بقناعة تامة و بتمهل و تأنى فى أخذ القرار و ليس جوازه و السلام لأن الزواج رحلة عمر سيترتب عليها شكل حياتكم المقبلة كاملة و انها ليست مجرد تجربة فحاولوا ان تجعلوا المعايير تلائمكم تماما و ليس صحيحاً - بالنسبة للبنات- أن ظل راجل و لا ظل حيطة نسمع احياناً عن حالات كثيرة تعانى فيها المرأه من زوجها الذى اختارته تسرعاً و بدون تأكد و معرفة و تكون النتيجة فى مثل هذه الحالات ان ظل الحيطة كان أحسنلهم بكتيييير من زوج يعذبها و يذيقها من العذاب صنوفاً و ألواناً .

- لا يوجد إنسان كامل على وجه الأرض و كل له عيوبه فحاول ان تدرك عيوب شريكك و انها عيوب مقبولة بالنسبة لك

- انتم تبحثون عن الأنسب و ليس الأفضل و بمناسبة الموضوع دا اذكر مقولة معبرة اوى عن الحكاية دى بتقول :

""و كأنما الناس قد خلقوا انصافاً ثم نثروا فى هذه الحياة فمن وجد نصفه صار كلاً و من وجد غيره صار مسخاً و من لم يجده عاش نصفاً"" .

فحاولوا و انتم تبحثون ان تبحثون عن نصفكم و ليس غيره حتى تصير الحياة الأسرية حياة مستقرة و هادئة و لا تبحثوا عن نصف آخر حتى لو كان الأفضل لكنه ليس الأنسب و أرى العيش نصفاً يكمله أشياء أخرى أما العيش مسخاً يمسخ حياة الإنسان فلا داعى للزواج من أجل الزواج دون التأكد قدر الإمكان

و التوفيق من عند الله والله لا يضيع أجر من يعمل و يحسن عمله و يأخذ بالأسباب قدر طاقته.

الجزء القادم ان شاء الله نتكلم عن اللقاء الأول و لقاءات التعارف و كيف تستعد للقاء الأول و قد نبدأ فى الحديث عن مرحلة الخطبة.